Hosea 11 Aleppo Codex 1א כי נער ישראל ואהבהו וממצרים קראתי לבני 2ב קראו להם כן הלכו מפניהם--לבעלים יזבחו ולפסלים יקטרון 3ג ואנכי תרגלתי לאפרים קחם על זרועתיו ולא ידעו כי רפאתים 4ד בחבלי אדם אמשכם בעבתות אהבה ואהיה להם כמרימי על על לחיהם ואט אליו אוכיל 5ה לא ישוב אל ארץ מצרים ואשור הוא מלכו כי מאנו לשוב 6ו וחלה חרב בעריו וכלתה בדיו ואכלה--ממעצותיהם 7ז ועמי תלואים למשובתי ואל על יקראהו--יחד לא ירומם 8ח איך אתנך אפרים אמגנך ישראל--איך אתנך כאדמה אשימך כצבאים נהפך עלי לבי יחד נכמרו נחומי 9ט לא אעשה חרון אפי לא אשוב לשחת אפרים כי אל אנכי ולא איש--בקרבך קדוש ולא אבוא בעיר 10י אחרי יהוה ילכו כאריה ישאג כי הוא ישאג ויחרדו בנים מים 11יא יחרדו כצפור ממצרים וכיונה מארץ אשור והושבתים על בתיהם נאם יהוה {ס} 12א סבבני בכחש אפרים ובמרמה בית ישראל ויהודה עד רד עם אל ועם קדושים נאמן The Aleppo Codex without Vowel Points or Punctuation Based on the electronic edition at mechon-mamre.org. For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. |
    |