1 א-ב  שיר מזמור לדוד נכון לבי אלהים אשירה ואזמרה אף-כבודי

2 ג  עורה הנבל וכנור    אעירה שחר

3 ד  אודך בעמים יהוה    ואזמרך בלאמים

4 ה  כי-גדול מעל-שמים חסדך    ועד-שחקים אמתך

5 ו  רומה על-שמים אלהים    ועל כל-הארץ כבודך

6 ז  למען יחלצון ידידיך    הושיעה ימינך וענני

7 ח  אלהים דבר בקדשו--אעלזה    אחלקה שכם ועמק סכות אמדד

8 ט  לי גלעד לי מנשה ואפרים מעוז ראשי    יהודה מחקקי

9 י  מואב סיר רחצי--על-אדום אשליך נעלי    עלי-פלשת אתרועע

10 יא  מי יבלני עיר מבצר    מי נחני עד-אדום

11 יב  הלא-אלהים זנחתנו    ולא-תצא אלהים בצבאתינו

12 יג  הבה-לנו עזרת מצר    ושוא תשועת אדם

13 יד  באלהים נעשה-חיל    והוא יבוס צרינו