1 א  למנצח מזמור לדוד ב  השמים מספרים כבוד-אל    ומעשה ידיו מגיד הרקיע

2 ג  יום ליום יביע אמר    ולילה ללילה יחוה-דעת

3 ד  אין-אמר ואין דברים    בלי נשמע קולם

4 ה  בכל-הארץ יצא קום    ובקצה תבל מליהם לשמש    שם-אהל בהם

5 ו  והוא--כחתן יצא מחפתו    ישיש כגבור לרוץ ארח

6 ז  מקצה השמים מוצאו--ותקופתו על-קצותם    ואין נסתר מחמתו

7 ח  תורת יהוה תמימה משיבת נפש    עדות יהוה נאמנה מחכימת פתי

8 ט  פקודי יהוה ישרים משמחי-לב    מצות יהוה ברה מאירת עינים

9 י  יראת יהוה טהורה--עומדת לעד    משפטי-יהוה אמת צדקו יחדו

10 יא  הנחמדים--מזהב ומפז רב    ומתוקים מדבש ונפת צופים

11 יב  גם-עבדך נזהר בהם    בשמרם עקב רב

12 יג  שגיאות מי-יבין    מנסתרות נקני

13 יד  גם מזדים חשך עבדך--    אל-ימשלו-בי אז איתם ונקיתי    מפשע רב

14 טו  יהיו לרצון אמרי-פי והגיון לבי    לפניך יהוה    צורי וגאלי