1 א  למנצח מזמור לדוד ב  יענך יהוה ביום צרה    ישגבך שם אלהי יעקב

2 ג  ישלח-עזרך מקדש    ומציון יסעדך

3 ד  יזכר כל-מנחתך    ועולתך ידשנה סלה

4 ה  יתן-לך כלבבך    וכל-עצתך ימלא

5 ו  נרננה בישועתך--    ובשם-אלהינו נדגל ימלא יהוה    כל-משאלותיך

6 ז  עתה ידעתי--    כי הושיע יהוה משיחו יענהו משמי קדשו--    בגברות ישע ימינו

7 ח  אלה ברכב    ואלה בסוסים ואנחנו    בשם-יהוה אלהינו נזכיר

8 ט  המה כרעו ונפלו    ואנחנו קמנו ונתעודד

9 י  יהוה הושיעה    המלך יעננו ביום-קראנו