1 א  למנצח אל-הנחילות    מזמור לדוד ב  אמרי האזינה יהוה    בינה הגיגי

2 ג  הקשיבה לקול שועי--מלכי ואלהי    כי-אליך אתפלל

3 ד  יהוה--בקר תשמע קולי    בקר אערך-לך ואצפה

4 ה  כי לא אל חפץ רשע אתה    לא יגרך רע

5 ו  לא-יתיצבו הוללים לנגד עיניך    שנאת כל-פעלי און

6 ז  תאבד דברי כזב    איש-דמים ומרמה יתעב יהוה

7 ח  ואני--ברב חסדך אבוא ביתך    אשתחוה אל-היכל-קדשך ביראתך

8 ט  יהוה נחני בצדקתך--למען שוררי    הושר (הישר) לפני דרכך

9 י  כי אין בפיהו נכונה--קרבם הוות    קבר-פתוח גרנם לשונם יחליקון

10 יא  האשימם אלהים--    יפלו ממעצותיהם ברב פשעיהם הדיחמו--    כי-מרו בך

11 יב  וישמחו כל-חוסי בך לעולם ירננו--    ותסך עלימו ויעלצו בך    אהבי שמך

12 יג  כי-אתה תברך צדיק    יהוה--כצנה רצון תעטרנו