1 א  למנצח מזמור לדוד ב  שמע-אלהים קולי בשיחי    מפחד אויב תצר חיי

2 ג  תסתירני מסוד מרעים    מרגשת פעלי און

3 ד  אשר שננו כחרב לשונם    דרכו חצם דבר מר

4 ה  לירת במסתרים תם    פתאם ירהו ולא ייראו

5 ו  יחזקו-למו דבר רע--    יספרו לטמון מוקשים אמרו    מי יראה-למו

6 ז  יחפשו עולת--    תמנו חפש מחפש וקרב איש    ולב עמק

7 ח  וירם אלהים    חץ פתאום--היו מכותם

8 ט  ויכשילוהו עלימו לשונם    יתנדדו כל-ראה בם

9 י  וייראו כל-אדם    ויגידו פעל אלהים ומעשהו השכילו

10 יא  ישמח צדיק ביהוה וחסה בו    ויתהללו כל-ישרי-לב